Manchester United forward Joshua Zirkzee chu Netherlands squad-ah koh a ni ta e. Sunderland striker Brian Brobbey-a'n Ningania Germany nena 1-1 a an inhnehtawk ṭuma a malpui (hamstring) a hliam tak avangin, Dutch head coach Xavi Hernandez chuan a thlaktu atan Kum 25 mi Zirkzee hi a thlang ta a ni.
Germany nena an inkhelh ṭum khan Brobbey hi a malpui chelh vawng vawng chungin mual a chhuahsan a ngai a. Match zawha press conference-ah Xavi chuan Brobbey hi inenkawl turin Sunderland lamah a kir a ngai ta tih leh, a thlaktu tur striker dang a koh belh tur thu a lo puang tawh a ni. Xavi chuan, "Brian-a hliam hi a pawi hle a, striker dang kan koh a ngai dawn a ni. Tunge ni dawn tih erawh kan la thlang fel hman lo," tiin a lo sawi a nih kha.
Tunah chuan ruahmanna siam fel a ni ta a, Pathiannia Nations League-a Serbia an luhchhuah hmain Zirkzee hian Xavi-a naute a zawm dawn a ni. Manchester United tana tun season-a vawi li (4) inlan tawh Zirkzee hi Zirtawpni zan khan Amsterdam-a KNVB headquarters-ah an medicial staff-te endikna paltlang turin a inreport a, a team-mate dante a zawm zui nghal a ni.
Inrinni hian Zirkzee leh a team-mate-te hi Belgrade panin thlawhtheihna hmangin an thlawk chhuak ang. He Serbia nena an inkhelh tur hi Zirkzee-a'n an ram tana match pathum an khelh tur zinga a hmasaber tur a ni dawn a ni. Belgrade-a an zin zawh hnu hian, Netherlands hian Ningani, October 1-ah Greece an pan leh ang a, chumi hnuah Eindhoven-ah Serbia bawk hi an mualah an lo mikhual leh thung ang.
Ningania Germany nen 1-1 a an inhnehtawk ṭum khan, Netherlands head coach thar Xavi Hernandez tan hian a debut match a ni a, tunah chuan hnehna hmasaber zawn a ngai ta a ni. Jurgen Klopp-a enkawl Germany tan Felix Nmecha-a'n hma hruaina goal a khung hnuah, Liverpool forward Cody Gakpo chuan stoppage-time-ah Dutch tan an siphurh a rawn sut a ni.
Mahse, Xavi chuan an team-in hnehna chang zawk tura che ṭha zawk an nih thu a sawi a. Netherlands hian shot 22 zet neiin, goal zawnah 10 an pet a, chance ṭha tak vawi nga ngawt an siam bawk a, Germany goalkeeper Marc-Andre ter Stegen-a'n vawi nga ngawt a lo dang a ni. Xavi chuan, "A tawpah chuan chak zawk kan phu a ni. Chance kan siam hnem a, tumpuite pawh kan nawr na a, second half-ah phei chuan kan chungnung zawk daih a ni," tiin a sawi.
Ter Stegen-a chet ṭhat dan sawizuiin Xavi chuan, "Inkhelh ropui tak a phochhuak a, match zawhah pawh Marc-a chu ka hrilh nghe nghe a ni. Ka ṭhian ṭha tak, mi ropui leh professional tak a ni a. A che ṭha hi ka lawmpui hle a, mahse kan lakah a rawn che ṭha tlat a ni. Germany-in vawiina point khat an hmuh hi Marc-Andre-a vang liau liau a ni," tiin a sawi bawk.
