Slovenia head coach Bostjan Cesar chuan Nations League match thleng tur atana a squad aṭanga inhnukdawk Manchester United striker Benjamin Sesko chu a career-ah "hun harsa tak" a hmachhawn mek tih a sawi.

Manchester United striker hi Scotland, North Macedonia leh Switzerland te hmachhawn tura Slovenia squad-ah koh a lo ni tawh a, mahse a khingpui (shin) a nat leh tak avangin squad aṭang hian a inhnukdawk ta a ni.

May thlaa Liverpool an hneh ṭuma a hliam avang khan Sesko hian pre-season a hmang thei lo hrim hrim a. Head coach Michael Carrick chuan he forward rawn kir leh hi puitling tak leh fimkhur takin a enkawl a, Carabao Cup-a Brighton an hneh loh ṭum khan a bul a ṭantir a, minute 66-naah lakchhuah a ni.

Hemi hnua Inrinni-a Fulham an hmachhawn ṭum khan London panin team a zui ve ta lo a. Pathianni khan Carrick-a'n a khingpui hliam vang a nih thu a nemnghet a, Thawhṭanni khan Sesko-a'n Slovenia squad aṭanga a inhnukdawk tih a puang ta a ni.

Instagram-ah Sesko-a'n thuchhuah siamin, "Ram team match hmachhawn tur ka hmaih a ngai hi ka pawi ti takzet a ni. Slovenia tan hian thinlung leh chapo takin ka khel ṭhin a, ka khel zel bawk ang," tiin a ziak. "Tunah rih chuan ka dam leh vat nan rilru zawng zawng ka pek a ngai a ni. National team leh ka club-te puih leh thuai a nih theih nan khelmual a ka kir leh vat nan ka thawkut mek a ni. Ka ṭhiante ka ring a, kan team spirit ṭha tak kha an phochhuak leh ngei ang tih ka chiang a ni. Slovenia shirt hak leh vat ka chak tawh hle a, chumi hma chu Slovenia ṭantutu lian ber ka ni reng ang," a ti bawk.

Slovenia-ah chuan squad a chhuahsan tak avangin sawiselna a tawk nual a, a ram tan hian kum liam ta October thlaa World Cup qualifying-a Switzerland an hmachhawn hnu khan a la inlan leh lo a ni. Mahse Planet Nagomet hnenah Cesar chuan Sesko-a dinhmun hi a hriatthiampui hle tih a sawi.

"Benjamin tan hian hun awlsam a ni lo," tiin Cesar chuan a sawi. "A career-ah hun harsa tak a paltlang mek a, a hma chuan hliam hi a tawk ngai meuh lo a ni. Hei hi hliam pangngai lo tak niin, dam leh nan hun a mamawh thui hle a ni. Tunah chuan Sesko-a'n a rintlak leh a rin a mi te a hualvel a, a vel a awm zawng zawng ten rilru ṭha leh phur tak an put tlat a pawimawh ber a ni. Chu chu a mamawh chu a ni. Hun a mamawh a, enkawlna ṭha a mamawh bawk - tin, a hrisel ṭhat tak tak hnuah Slovenia pawhin an mamawh takzet a ni," a ti.

United-a a hmachhawn pressure chungchang an zawhna chhangin Cesar chuan, "Club lian tak tana i khelh chuan hetiang thil hi a thleng ṭhin tih kan hria. Hei hi Benjamin chauh ni lo, footballer zawng zawng paltlang ṭhin a ni. A fit a, goal a khung zut zut lai khan hetiang sawiselna hi a awm lo hrim hrim a. Ani pawhin hei hi a hria a, professional tak a ni. Heng thu sawizawmtet hi chhiarin a rilru a tibuai lo turah ka ngai. Player naupang tak a la ni a, a nuna thilte hi a kal pantlang nasat em avangin a rilru pawh a puitling tawh hle a ni," a ti bawk.

Tun kar chhung khan Carrington-ah Sesko hi endik a ni a, United chuan mimal taka enkawlna (recovery plan) an pe mek a ni. United-in October ni 10-a Tottenham Hotspur an hmachhawn hunah chuan fit taka inlan hman a inbeisei hle a ni.