Kumin nipui transfer bazar chhung khan Manchester United chuan an midfield thuam chak lam an ngaihpawimawh hle a, mahse tunah erawh tlarhma tichak tura hma la leh turin ngenna an dawng ta thung. Season bul an ṭanna match nga khelh tawhah an tlarhma mi pathum—Bryan Mbeumo, Benjamin Sesko leh Matheus Cunha te chuan an zavaia thawhkhawmin goal li (4) chiah an la khung thei a ni.
Sesko hi season liam ta tawp lamah khan a inhliam avangin tun season-ah pawh minute 76 chiah a la khel thei a. United hian Champions League khelh tur an neih belh bawk si avangin match khelh tur a tam chho dawn a, hetiang dinhmunah hian tlarhma thuamchak belh an mamawh ngei a rinawm hle.
Sesko-a'n Old Trafford a pan hma khan England striker Ivan Toney hi United zawm tura sawizawm a lo ni tawh ṭhin a. Brentford-a a awm lai khan Manchester pan tura sawi rik ni ṭhin mah se, Premier League chhuahsanin Saudi Pro League lam a pan ta zawk a nih kha.
Toney-a'n Saudi club Al-Ahli tana goal a khung hnem theihna chuan World Cup khel tur England squad-a koh let a nih theih phah a. Tunah hian United player hlui, nomawi vawi tam tak lo chawipui tawhtu Gary Pallister chuan manager Michael Carrick chu Gulf bial aṭanga Toney lak kir theih dan kawng dap turin a ngen ta a ni. Kum 30 mi Toney hian season liam ta khan Saudi league-ah goal 32 ngawt khungin, Cristiano Ronaldo leh Karim Benzema te aia goal khung hnem a ni phah a, tun season tharah pawh match 7 khelhah goal 10 a khung tling leh der tawh a ni.
Brentford tana a khelh lai pawhin Premier League-ah a che ṭha em em a, top flight-a an kaisan theih nan hmun pawimawh tak a luah bawk. Brentford tan top flight match 83 a inlanah goal 36 a khung a, 2022-23 season-ah phei kha chuan Erling Haaland leh Harry Kane te chiah pha lovin he division-a goal khung hnem pathumna a ni hial a ni.
Pallister chuan Betarades.gr hnenah, "Tawnhriat nei ṭha zawk player kan mamawhin ka hria. Sesko hi he squad-ah hian player pawimawh tak ni chhunzawm turin a la naupang ṭha a, mahse player puitling famkim a la ni rih lo. Tawnhriat nei ṭha leh Premier League hrechiang player kan mamawh a ni a, mahse tun dinhmunah hetiang English striker tawnhriat ngah hi an tam lo hle mai," tiin a sawi.
Pallister chuan sawi zawmin, "Tun dinhmuna a contract neih lai thlirin, Ivan Toney hi Man Utd-a rawn kal turin sum kan thehchhuak tawk zo angem tih chu ka hre lo. Mahse ani chuan goal a khung thei a, Premier League-ah pawh goal a khung reng ṭhin a ni. Ivan Toney hian goal a khung dawn tih ka chiang a, Premier League hrechiang mi kan mamawh a ni," tiin a sawi bawk.
Toney hi United nena sawizawm a nih vawikhatna a ni lo. April 2024 khan, Al-Ahli a zawm hma thla tlemteah, Peterborough United chairman Darragh MacAnthony chuan London Road-a a lo thawhpui tawh he striker chungchang hi Sky Sports hnenah a lo sawi tawh bawk a ni.
MacAnthony chuan, "Arsenal team-ah dah chhin la, Liverpool emaw Man United team-ah pawh dah la, season khatah Premier League goal 30 a khung ang. He ngaihdan la pawm lo an awm a nih chuan, kum hnih leh a chanve liam ta chhung khan inkhel an en lo a ni ngei ang," tiin a lo sawi a.
"Khawvel pumah hian he player lei thei club panga vel chauh an awm ang a, chung club-te chu a zawm a nih chuan a tiṭha lehzual ngawt ang. Manchester United phei chu Premier League title chuhpui thei khawpin a siam danglam thei a ni," tiin a lo fak tawh hle a ni.
