Nilaithawhṭan zan Nations League match-ah Portugal chuan Wales chu 1-0 in an hneh a, he match-ah hian Manchester United star Bruno Fernandes chu mual veilam sir (left-winger) ah khelhtir a ni. Mahse, Portugal manager thar Jorge Jesus chuan a match hmasaber enkawlah he midfielder kum 32 mi chet dan hi a duhkhop lo hle tih a sawichhuak.
Kum 2020-a Old Trafford a thlen aṭang khan Fernandes hi United tana player pawimawh ber leh innghahna lian ber a ni chho reng a. Club tan goal 111 khung tawhin assist vawi 106 a nei tawh a, thla liam ta khan Ipswich Town laka 5-2 a an chak ṭum pawh khan hat-trick a lo siam tawh a ni. Kum 2023 July thla khan club captain atan ruat a ni a, tun thlengin he mawhphurhna hi a la chelh zui reng a ni.
Mahse, nikum lam khan United manager hlui Ruben Amorim-a hnuaiah Fernandes-a khelhna hmun chungchangah hian sawiho a tam hle a. A hma chuan No. 10 position-ah khel tlangpui ṭhin mah se, Amorim-a ruahmannaah No. 10 hmun a awm ve tak loh avangin hmun dangah sawn a ni a. No. 8, No. 6, leh mual veilam sirah te khelhtir a nih takah khan a che ṭha hleithei lo a nih kha. Amorim-a ban a nih hnuah Michael Carrick-a hnuaiah a khelhna hmun pangngai No. 10-ah a kir leh a, season liam ta khan Premier League-a season khata assist ngah ber record thar siamin PFA Player of the Year atan thlan a ni hial a ni.
Lisbon khawpuia Estadio Jose Alvalade-a Wales laka an inkhelh ṭum khan, manager thar Jesus chuan Fernandes hi mual sir lamah a khelhtir leh a. Chelsea star hlui Joao Felix chu Fernandes-a khelhna ṭhin tlarhma laili (central) ah khelhtirin, Felix-a goal khung hmang hian Portugal hian hnehna an chang ta a ni. Mahse, mual siri mal taka awm Fernandes-a chet danah Jesus hi a lungawi tawk lo hle.
Minute 90-naa Joao Neves-a thlaktu atana lakchhuah Fernandes-a chungchang sawiin Jesus chuan RTP hnenah, "Match tin hian chanchin hrang an nei ṭheuh a. Ruben Amorim-a hnuaiah pawh khan hetiang hian a lo khel tawh ṭhin a, a hmun hriat lar tak a ni. Danglamna awmchhun chu, tlarhnung venhimna lamah a tawlh hnung thuk deuh a ngai a ni. Ball a chan lai khan a aia ṭha khan a che thei a, team hian a mamawh lehzual a ni," tiin a sawi.
Fernandes pawhin a khelhna hmun thar chungchangah ngaihdan a nei ve bawk. "In lo chhinchhiah a nih chuan, mual sirah khan ka awm tam lo hle. Tlarhnung venhimna lamah erawh full-back-te nawr turin ka tawlh hnung ṭhin. Hemi piah lamah chuan, manager ruahmanna kha a ni deuh ber a, tlar lailia player awm, inkhel thunun thei leh tlarhma striker-te thlawp thei tur a duh a ni. Chu chu ka thil tih pawh a ni. Manager-in he match-ah hian he hna hi thawk turin min ngen a. A hnuaiah hian hmun hrang hrangah ka khel thei tih min hrilh tawh a, ka tan chuan team puih hi a pawimawh ber a, manager-in khawi hmunah pawh min dah se ka theihtawp ka chhuah reng ang," tiin a sawi.
Match result chungchangah Fernandes chuan, "Chance tam tak kan siam a, khingpuite bial chhungah kan awm deuh chawt a ni. Ball kan thunun hnehin inkhel pawh kan thunun hneh hle. Match tinah hian siamṭhat tur chu a awm reng a, mahse kan che ṭha hle chuan ka hria. Ni thum chauh training kan neih hnuah team hian manager ruahmanna kan man hneh hle a ni," tiin a sawi belh bawk.
