Nipui bazar liam ta khan Manchester United chuan left-back thar an lalut lova, he thutlukna hian head coach Michael Carrick-a tan harsatna a thlen mek a ni.
Luke Shaw chuan mual sir tlan kual turin a taksa lamin a tlin tawh meuh lova, fitness buaina vangin match hnih a khel thei tawh lo bawk. Patrick Dorgu pawhin tlarhnung lamah phili lova chet vel leh hmun awl ven kawngah puitlin a la mamawh hle a ni.
Mahse, he an tihsual siamṭhat theihna hunṭha hi INEOS chuan January thlasik bazar inhawng turah an nei dawn niin a lang.
TEAMtalk-in a tarlan danin, Crystal Palace left-back Tyrick Mitchell chuan a contract kum hnuhnung ber a hman chhoh mek laiin Manchester United mit a la hle a ni. Mitchell hi season tawpah free agent a ni thei dawn a, mahse January thlaa kalsawn mai theihna hi "a lian chho tial tial" niin hriat a ni.
Kum 27 mi English left-back Mitchell hian Palace tan league match 200 chuang a khel tawh a, a contract neih lai a zawh mai dawn avangin United tan chuan "man tlawm zawka defender lakluh theihna hunṭha tak" a inhawng a ni.
Palace (Eagles) lam hian Mitchell-a contract hi pawhsei tumin theihtawp an chhuah mek a, thlem tumin ṭan an la hle; mahse United ang club lianin an ngaihven takah chuan he defender rintlak tak rilru hi a buai chho maithei a ni.
United hian Mitchell-a dinhmun hi "uluk takin an thlithlai reng" nia tarlan a ni a. Palace star hi Premier League chhungril hrechiang tawh, tawnhriat ngah leh inpeih sa (ready-made) player-ah an ngai a ni.
Nipui bazar lai khan Lewis Hall chu club-in lakluh an duh ber ni mah se, Old Trafford-ah hian an la ngaihven reng tho na a, Mitchell hi Hall aiin a man a tlawm zawk fê dawn a, January thlaa he transfer tihpuitlin hi "thil tih theih tak" (doable) ah an ngai a ni.
Mitchell hi Liverpool leh Chelsea pawhin an ngaihven ve bawk.
Palace chuan an left-back hi inremna thar ziahpui theih an la beisei cheu a, mahse thla reilote chhung hian inremna an siam thei lo a nih chuan, nakkuma a thlawna chhuahtir mai aiin January thlaa man tlem tal nena hralh chhuah chu an duh zawk dawn a ni.
