Liverpool legend Jamie Carragher chuan Manchester United-in an manager Michael Carrick an ban a nih chuan thutlukna "atthlak tak" (ludicrous) a nih tur thu a sawi chhuak.
Season liam ta khan interim boss Carrick-a hnuaiah United te hi an rawn che ṭha chho hle a. Ruben Amorim-a hnuaia harsatna tawk ṭhin kha pathumna dinhmun luah puiin Champions League khel turin an tling a ni. Mahse 2026/27 season tharah hian Old Trafford club hian bul an ṭan ṭha lo hle a ni.
United hian an chanchina season bul ṭan chhiat ber tum an rawn tluk leh ta chiah a, hei hi season liam taa Ruben Amorim-a hnuaia an bul ṭan dan leh 1992/93 season-a Sir Alex Ferguson-a hnuaia an bul ṭan dan nen a inang chiah a ni. Hemi avang hian United midfielder hlui Carrick-a hian pressure lian tak a hmachhawn mek a ni.
Pathiannia Fulham mualah 1-1 a an inhnehtawk hnuin Carrick-a naute hi Premier League table-ah 12-na dinhmunah an awm mek. International break a thlen tak avangin, October 10-a Old Trafford-a Tottenham Hotspur an hmachhawn hmain inbuatsaihna hun kar thum chhung an nei dawn a ni.
Sky Sports pundit leh defender hlui Carragher chuan 'The Overlap Fan Debate'-ah Carrick-a thlawp zel a pawimawh zia sawiin, "Michael Carrick-a ban mai tumna hi chu thil atthlak tak a ni. Carrick hi hun rei tak chhung United manager ni turin ka thlir hran lo a, club-in hun harsa an hmachhawn laia puitu leh an harsatna tawk mek min chhuahpui tur anga ngaih a ni zawk.
"Disrespectful zawnga sawi ka ni lo, a rawn luh tirh khan Manchester United hian inbengdaihna leh muangfan taka chet an mamawh takzet a ni. Tunah emaw, international break dawtleha Carrick-a thlak tumna ngaihtuah hian awmzia a nei lo. Inbengdai a, thil thleng mek hi kaltlang rih phawt se a ṭha ber," tiin a sawi.
United-in season bul an ṭan chhiatnaah hian Hull City laka an tlawm bakah, Manchester derby-ah mualneitu zawk ni chungin leh Man City-in red card an hmuh avanga player 10 chauhva an khelh chung pawha an hneh loh kha a tel a ni. League Cup-ah mualneitu zawk ni chunga goal hnih faia an hmahruaina hlohva Brighton & Hove Albion laka an tlawm leh phei chuan Old Trafford-a an buaina chu a tizual sauh a ni.
Carrick-a hian team-in fitness an tlachham anga ngaihna chu a hnawl a. Matheus Cunha-a'n Craven Cottage-a inhnehtawkna match second half ṭan tirah Fulham player-te hian "phurna leh tha an nei zawk" ti a a sawi chungchangah Carrick chuan, "Ka hmuh dan chuan chutiang a ni hauh lo. Match kan khar danah khan ka lungawi hle a, a tawp thlengin kan nawr zui ngawrh hle bawk. Chuvangin heng thil hi buaina tur a awm lo," tiin a chhang bawk.
