Manchester United manager hlui Ole Gunnar Solskjaer chuan January thlaa Ruben Amorim-a hmunruak luah tura Manchester United executive-te Omar Berrada leh Jason Wilcox te nen inbiakna an neih ṭum khan, amah pawh he hna chelh tura mi duhawm berte zinga mi ni mah se, a thawhpui hlui Michael Carrick chu a lo thlawp em em zawk thu a sawichhuak.

Kum 2018 leh 2021 inkar khan Old Trafford-ah Solskjaer hi kum thum chhung head coach-in a lo awm tawh a ni. United hotute nen interim manager nih chungchanga an inbiak ṭum hian, Solskjaer leh Carrick te hi he hna chelh tura beisei sang ber ber an ni a. Hemi chungchang hi TV2 hnena a sawinaah Solskjaer chuan: "United hotute nen kan inbiak khan Michael-a ṭhatna leh theihna pawh ka lo sawi lang a, 'Ani hi in thlang a nih chuan mi ṭha leh rintlak tak in hmu ang,' tiin ka hrilh a ni," tiin a sawi.

Solskjaer chuan a sawi zawmnaah, "Ani pawhin chutiang chuan ka chungchang a sawi ve ka ring. Michael hian he club hi hmalam panpui theihna a nei a, ani hi mi dik tak a ni tiin ka hria. Club a hrethiam a, fan-te a hrethiam a, thil mamawh a hre bawk a ni," tiin a sawi. Kum 53 mi Norwegian manager hian hlawh chungchang leh contract sei zawng lamah phut engmah a neih loh thu sawiin, interim coach anga season tawp thleng enkawl chungchang sawi a nih thu leh, "Kan pahnihin he hna hi chan tum ngawih ngawih kan ni lo a, mahse min sawm a nih chuan kan inpeih ve ve thung a ni," a ti bawk.

Old Trafford-a a hna hmabak a la hlen zawh loh anga a inngaih thu zep lovin Solskjaer chuan: "Tih zawh loh leh hlen loh nei anga inngaihna ka la nei a. Hetiang hunṭha hi vawi khat tal hmu leh ka chak chiang alawm," tiin a sawi a. Mahse tun dinhmunah Carrick hi a thlawp tlat thu sawiin, problem aia challenge tia sawi zawh zawk tur harsatnate United chhungrilah a awm thu a sawi lang bawk.

Tun dinhmunah Carrick-a hnuaiah United te hi inelna hrang hrangah a zawnin match 9 chhung chak nei mual mual lovin an buai mek a, heti avang hian a hna aṭanga ban a nih mai lohnan pressure lian tak a hmachhawn mek a ni. United board chuan November international break hma ngeia an dinhmun siamṭha turin hun an pe rih a. United nen hian manager thar atan Eddie Howe leh Julian Nagelsmann te sawizawm mek an ni bawk.