Premier League-in sum leh pai hman chungchanga dan an siamte (financial regulations) bawhchhia tia hekna thubuai 115 awm zinga a tlangpui deuhthawah Manchester City-in thiam loh an chang ta tih thuthang a darh hnuah, Manchester United defender hlui Rio Ferdinand chuan Premier League winners' medal dang a dawn belh theih mai a inrin thu fiamthu thawh nan a hmang.
He thutlukna hian English football pum huapah nghawng lian tak a nei thei dawn a, Manchester United thleng pawhin an nghawng tel maithei a ni. City hi an laka thubuai 115 thehluh zinga pakhat chiah tih lohvah chuan thiam loh chantir an ni niin chanchinbu hrang hrangin an tarlang a. Engtiang chiahin nge hremna an dawn dawn tih erawh bithliah a la ni lova, City lam hian he thutlukna hi an appeal ngei rin a ni bawk.
Hemi chungchangah hian Manchester City aiawh thupuangtu chuan thuchhuah siamin, "Premier League kalphung hi a la kal mek a, thil pawimawh tak tak la chinfel tur a la awm bakah thuruk vawn him ngai a ni. Chuvangin Manchester City FC dinhmun chu February 2023-a club thuchhuah nena a inrem dan a la ngai reng a ni. Premier League board leh executive-te chu tu lam mah ṭan bik nei lo, rualkhai leh dik taka thil thunun theitu an nihna anga an chet theih nan kum riat chhung zet chu club hian he kalphung hi ṭha takin kan zawm a ni," tiin a sawi.
City hian kum 2009 leh 2018 inkar chhunga Premier League sum enkawl dan tura dan siamte an bawhchhia tih puhna thubuai 115 hi a tir aṭangin an pha char char ṭhin a ni. He thubuai hi February 2023 khan thehluh ṭan niin, September leh December 2024 inkar khan a thubuai ngaihtuahna (hearing) hi neih a lo ni tawh a ni. An puhna zinga langsar zualte chu sum leh pai dinhmun dik lo thehluh thubuai 54 leh, player bakah manager-te hlawh pek dan chungchanga thubuai 14 te a tel a ni.
Hearing an neih zawh aṭanga kum hnih dawn a liam hnuah, independent commission chuan he thubuai chungchangah hian thutlukna an siam ta ngei niin a lang. Premier League dan hnuaiah hian City hian sum chawitir aṭanga point paihsak, a nih loh pawhin league aṭanga hnawhchhuah hial pawh an tawk thei a ni.
Heng thuthang a hriat hnu hian Ferdinand chuan social media platform X-ah, "Ka bawm chhungah Premier League medal dang pakhat dah belh a ngai dawn ta e," tiin a ziak a. Instagram lamah pawh he fiamthu hi chhunzawmin, Old Trafford-a a awm laia medal a lo dawn tawhte nena an thlalak tarlang chungin, "Yooooooo Premier League... medal pasarihna chu post hmanga min rawn thawn turin ka inpeih e!" tiin a ziak bawk.
United defender hlui hian kum 2011-12 season kha a kawk nia hriat a ni a. Khami season khan Sir Alex Ferguson-a naute chuan goal difference vang chauhvin City an pha ta lo a nih kha. QPR lakah hun tawp dawn second tlemteah Sergio Aguero-a'n goal ropui a khung tak avangin City kha an champion ta a ni. Kha mi ṭum khan United kha champion ta se chuan Ferdinand hian a vawi sarihna atan Premier League winners' medal a dawng thei dawn a ni.
